मराठी शब्दांचा खजिना वेबसाइटवर

दुवा : http://www.marathibhasha.com/

-------------------
मराठी शब्दांचा खजिना वेबसाइटवर
-------------------
परिभाषा कोशातील दोन लाख ७८ हजार शब्दांचा संग्रह खुला.

वाढत्या इंग्रजी शब्दांच्या वापरामुळे मराठीतील अनेक चपखल शब्द मागे पडू नयेत, यासाठी येथील 'समर्थ मराठी संस्थे'ने www.marathibhasha.com ही वेबसाइट तयार केली असून विविध क्षेत्रांत वापरल्या जाणार्‍या तब्बल दोन लाख ७८ हजार मराठी शब्दांचा संग्रह या निमित्ताने वेबसाइटवर उपलब्ध केला आहे.

महाराष्ट्र सरकारने काही वर्षांपूर्वी भौतिकशास्त्र, रसायनशास्त्र, प्रशासन अशा विविध क्षेत्रांतील प्रचलित शब्दांवर आधारित ४२ परिभाषा कोष तयार केले होते. यशवंतराव चव्हाण यांच्या पुढाकाराने झालेल्या या उपक्रमात मराठी विषयातील चारशेहून अधिक तज्ज्ञांचा सहभाग होता. मात्र, आता यातील अनेक पुस्तके उपलब्ध नाहीत, तसेच नागरिकांमध्येही याबाबत जागृती नाही. त्यामुळे या सर्व शब्दांचा संग्रह समाजासमोर पुन्हा एकदा खुला करावा, या उद्देशाने आम्ही या परिभाषा कोशातील २ लाख ७८ हजार शब्द वेबसाइटवर प्रसिद्ध केले आहेत, अशी माहिती 'समर्थ मराठी संस्थे'चे अनिल गोरे यांनी दिली. मराठी भाषाप्रेमी संजय भगत यांनी या उपक्रमासाठी विशेष सहकार्य केले आहे.

' परिभाषेबरोबरच लवकरच वेबसाइटवर म्हणींचा शब्दकोशही प्रसिद्ध होणार आहे. याशिवाय बँका, विमा कंपन्या, कागदपत्र, अर्जांचे नमुने, दुकानदारांसाठी मराठीतील पावत्याही उपलब्ध करण्यात येणार आहेत,' असेही गोरे यांनी सांगितले. सदाशिव पेठेतील कुसुमाग्रज यांच्या जन्मस्थळी या वेबसाइटचे नुकतेच लोकार्पण करण्यात आले

माहिती सौजन्य : महाराष्ट्र टाईम्स - २७ फेब्रु. २०१२